Uzaq - Rüfan Allahverdiyev | PDF YÜKLƏ

03.08.1995-ci il. Gecə saat 02:00. Süleymanovlar ailəsinin ikinci qız övladı, mən Həcər Süleymanova dünyaya gözlərimi açdım. Bu tarix hekayəmin başladığı, həm də başlamadan erkən bitdiyi tarix idi. Atam oğlan övladı istəsə də, anam qanı bahasına məni tələf etməyə qoymamışdı. "Uşaq qatili ola bilmərəm", deyib məni 9 ay öz bətnində qorumuşdu, ancaq bəxtim gətirmədi. Hələ doğulmadan atam məndən üz döndərmişdi. "Bu evdən kişi səsi gələcək, qız uşağı mənim övladım ola bilməz", deyə anamı yaxşıca kötəkləmiş, üstəlik şəxsiyyətini də alçaltmışdı. Hər dəfə anama "Niyə atamla ailə qurmusan?" sualını verdikdə gözləri dolur, başını aşağı salırdı. Bir gün xalam bizə anamla birlikdə keçirdiyi uşaqlıq xatirələrindən danışırdı. Bu xatirələr içərisində anamla, xalamın acı hekayələri var idi. Babamın öz qızlarını əşya kimi satdığı o günün hekayəsini danışıb, hönkür-hönkür ağlayırdı.

Yazıçı haqqında
Rüfan Allahverdiyev 2002-ci ildə Bərdə şəhərində anadan olub. O Bakı Dövlət Universitetinin beynəlxalq münasibətlər və iqtisadiyyat fakültəsinin məzunudur. Təlimçi və həvəskar yazıçıdır. Bundan öncə bir neçə bloq yazıları ilə qısa zamanda izləyicilərin sevimlisinə çevrilən yazıçı ilk kitabı olaraq "Uzaq" adlı əsərini oxucularının hüzuruna çıxarmışdır. Yazdığı kitab tamamilə öz təxəyyülünün məhsuludur. Müəllif həmin kitabla erkən nikahlara, selektiv abortlara ,bir sözlə, cəmiyyətə öz etirazını bildirmişdir. O həmçinin "Uzaq" kitabını daha çox valideynin oxuması və maariflənməsi üçün öz sosial media hesablarında insanlarla pulsuz olaraq paylaşmışdır. Yazıçı müsahibələrin birində belə qeyd etmişdir: "Bir gün valideynlər üçün kitab yazacağam və bütün valideynlər bu kitabı göz yaşları içərisində oxuyacaq. Onlar Uzaq-ı kitab deyə oxuyacaq, mən isə onlara övladlarını sevsinlər deyə məktub yazmış olacağam."